2013-2014թթ.

          2013-2014թթ. «Դպրոց-կենտրոնների միություն» իրավաբանական անձանց միությունը նախատեսում է իրականացնել հետևյալ գործողությունները.

1. Հանրակրթական ուսումնական ծրագրեր իրականացնող բոլոր տիպի դպրոցների համար ներդպրոցական վերահսկողության պլանավորման և իրականացման համալիր փաթեթի մշակում. փաթեթի ստեղծումը հնարավորություն կտա դպրոցում ուսումնադաստիարակչական գործընթացն ավելի արդյունավետ կառավարելու, առաջացող խնդիրները ժամանակին կանխելու և անհրաժեշտ փոփոխություններ կատարելու համար: Ծրագիրն ուղղված է հանրակրթական  ուսումնական ծրագրեր իրականացնող բոլոր տիպի դպրոցներում չափորոշչային պահանջների, ուսումնական պլանի, առարկայական ծրագրերի և դպրոցի ուսումնադաստիարակչական աշխատանքների տարեկան պլանի կատարողականի որակի, կառավարման և ղեկավարման արդյունավետության ու թափանցիկության բարձրացմանը:

2. «Դպրոցում սովորողների գիտելիքների, կարողությունների և հմտությունների գնահատում ըստ չափորոշիչների» ուղեցույցի ներկայացում. կրթության համակարգի ապակենտրոնացման և ժողովրդավարացման պայմաններում առաջ են գալիս երկրի կրթական տարածության ամբողջականության ապահովման և անհրաժեշտ հանրային կրթական մակարդակի ապահովման երաշխիքի խնդիրներ, որոնք լուծվում են սովորողների գիտելիքներին, կարողություններին և հմտություններին ներկայացվող չափորոշիչների միջոցով: «Դպրոցում սովորողների գիտելիքների, կարողությունների և հմտությունների գնահատում ըստ չափորոշիչների» ուղեցույցի ստեղծման նպատակն է ուսուցիչներին ներկայացնել ուսուցանող և թվանշանային գնահատման մեթոդներ և հնարներ, աշակերտների գիտելիքների, կարողությունների և հմտությունների վիճակի վերլուծության մոդելներ` ըստ ուսուցման ժամանակահատվածների:

3. Դպրոցի զարգացման ձեռնարկի  տպագրություն. 2013- 2014թթ. տնօրենների խնդրանքով նախատեսվում է տպագրել արդեն իսկ ստեղծված  դպրոցի զարգացման ծրագրի օրինակելի ձեռնարկ, որը  կտրամադրվի ՀՀ բոլոր դպրոցներին:

4. Էթիկայի նորմերի ձեռնարկի տպագրություն. 2013- 2014թթ. նախատեսվում է նաև տպագրել ուսուցչի էթիկայի նորմերը կարգավորող ձեռնարկ, որը կտրամադրվի ՀՀ բոլոր դպրոցներին:

5. Դպրոցի` առանձին մասնագիտական խմբերի հետ հանդիպումների կազմակերպում և գիտամանկավարժական թեմաներով  դասախոսությունների անցկացում. ԴԿՄ-ն պլանավորում է նաև կազմակերպել գիտամանկավարժական թեմաներով  դասախոսություններ, մասնագիտական հավաքներ,  քննարկումներ, որոնք կնպաստեն դպրոցի վարչական և մանկավարժական անձնակազմի շարունակական կրթությանը,  մասնագիտական զարգացմանը  և իրազեկվածության մակարդակի բարձրացմանը: