Մայիսը մեր ժողովրդի պատմության մեջ խորհրդանշական  ամիս է. Ավարայրից մինչ Արցախյան ազատամարտ, Սարդարապատից մինչև Շուշիի ազատագրում:Մայիսյան հաղթանակները նոր մաքառումների, նոր բարձունքների հասնելու են մղում բոլորիս: Հենց մայիսյան հաղթանակներին  էր նվիրված Մեծ Մասրիկի միջնակարգ դպրոցում կազմակերպված միջոցառումը: Այն յուրահատուկ էր նաև հյուրերի քանակով, որոնց թվում էին Գեղարքունիքի մարզի կրթության , մշակույթի և սպորտի վարչության պետ Գ.Բադալյանը, Վարդենիսի նորանշանակ զինկոմ փոխգնդապետ  Գ.Առաքելյանը, տարածաշրջանի դպրոցների տնօրեններ և զինղեկներ, ուսուցիչներ, ծնողներ, գյուղապետարանի ներկայացուցիչներ:

 Բացման խոսքով հանդես եկավ դպրոցի տնօրեն Ա. Հակոբյանը` նշելով, որ Հայրենական մեծ պատերազմի ավարտը, Շուշիի գրավումը և Արցախի բանակի կազմավորումը պատմական նշանակության ունեցան մեզ համար:

 Ապա տոնականորեն զարդարված բեմում զինվորական համազգեստ հագած աշակերտներն են: Նրանք իրենց ասմունքի ,երգերի միջոցով ներկայացրին Արցախյան պատերազմը, նրա հերոսներին: Խորհրդանշական էր տղաներին բանակ ճանապարհելու և նրանց կարոտագին դիմավորելու տեսարանը:

 Մասնակիցները շարային վարժությունների օգնությամբ հաստատեցին իրենց պատրաստակամությունը մեր երկրի խաղաղությունը, ազատությունն ու անկախությունը պահպանելու գործում:

 Զինղեկի մեկնաբանությամբ ցուցադրված տեսաֆիլմի կադրերը հանդիսատեսին մեկ անգամ ևս հնարավորություն տվին վերապրելու մեր զինվորների քաջագործությունները, այն ապրումները, որ ունեցել ենք այն օրերին:

 Մասնակիցները իրենց կեցվածքով, իրոք, ապացուցեցին, որ տղա թե աղջիկ, բոլորն էլ զինվոր են:

Կազմակերպիչները զինղեկ Ռ.Բարսեղյանը ու դաստ. աշխատանքների կազմակերպիչ Մ.Խլոյանն էին: Նրանց աշխատանքի արդյունքը ավելի քան գոհացուցիչ էր:

 Ցերեկույթն ավարտվեց ապագայի նկատմամբ մեծ լավատեսություն արտահայտող «Սասունցիների պարը» բանաստեղծության ասմունքով, ապա բոլորը սկսեցին պարել` իրենց խրոխտ շարժումներով ցույց տալով մեր հոգու վեհությունը, պայքարելու պատրաստ ոգին: Պարում էր ողջ դահլիճը` թե՛ մասնակիցները, թե՛ հանդիսատեսները, իսկ ուսուցիչների պարը անակնկալ էր:

 Վարդենիսի զինկոմ Գ.Առաքելյանը շնորհակալություն հայտնեց և նշեց, որ մեր վաղվա օրը հուսալի ձեռքերում է, որ դպրոցում սովորողների ռազմահայրենասիրական դաստիրակությունը բարձր մակարդակի վրա է: