19.05.2014թ. «Դպրոց կենտրոնների միություն» իրավաբանական անձանց միության և ՀՀ Մշակույթի նախարարության աջակցությամբ իրականացվող «Ազգային հպարտություն» ծրագրի շրջանակներում Վաղարշապատի Մ. Գորկու անվ. հ.5 դպրոցում տեղի ունեցավ դաս «Ես հպարտ եմ,որ..» թեմայով: Նախքան դասը մի խումբ աշակերտների նախաձեռնությամբ մայիսյան հաղթանակներին նվիրված դաս-միջոցառում տեղի ունեցավ, որն ուսուցիչների համար վարեցին հենց իրենք` աշակերտները: Այդ միջոցառման տրամաբանական շարունակությունը եղավ այն արժեքների ներկայացումը, թե ինչով ենք մենք հպարտ: Դասի հյուրն էր մեր քաղաքում շատ հայտնի Գրիգոր Մաչանենց Բաբախանյանը, ով Էջմիածնում գործող «Հայ Միասնության Խաչ» բարեգործական հասարակական կազմակերպության նախագահն է, մի շարք գրքերի հեղինակ և լուսանկարիչ: Աշակերտները մեծ խանդավառությամբ զրույցի բռնվեցին հյուրի հետ: Դասը բավականին հագեցած էր, հետաքրքիր և ուսանելի, որի ընթացքում ևս մեկ անգամ ընդգծվեցին մեր ազգային արժեքները և մեր ազգային դիմագիծը չկորցնելու և այն պահպանելու կարևորությունը: Դասի ավարտին ներկայացվեց մրցույթի ընթացակարգը և կանոնները, տրվեց հանձնարարականներ պաստառների նախապատրաստական աշխատանքներն իրականացնելու համար: