ԴԿՄ ամենամյա համաժողով
2018 թ. դեկտեմբերի 21-23-ը ք. Աղվերանում տեղի ունեցավ Դպրոց-կենտրոնների միության ամենամյա եռօրյա համաժողովը, որին մասնակցում էին ԴԿՄ անդամ ՀՀ բոլոր մարզերի 110 դպրոց-կենտրոնների տնօրեններ և փոխտնօրեններ: Համաժողովի բացման արարողությանը ներկայացվեց Դպրոց-կենտրոնների միության 7-ամյա գործունեության արդյունքներն ու հեռանկարային ծրագրերը: Ողջույնի խոսքով հանդես եկան ՀՀ ԿԳ նախարարի պաշտոնակատար Արայիկ Հարությունյանը, Երևանի քաղաքապետարանի հանրակրթության վարչության պետ Աննա Ստեփանյանը,<<Դպրոց-կենտրոնների միություն>> իրավաբանական անձանց միության նախագահ Ռուզաննա Մուրադյանը: Համաժողովի մասնակիցներին հնարավորություն ընձեռվեց վեր հանել հանրակրթության ոլորտում առկա խնդիրների և մասնագիտական կարիքների բացահատմանն ուղղված մի շարք հարցեր, որոնց վերաբերյալ նրանք ստացան սպառիչ պատասխաններ ՀՀ ԿԳ նախարարի պաշտոնակատար Արայիկ Հարությունյանի կողմից: Երևանի քաղաքապետարանի հանրակրթության վարչության պետ Աննա Ստեփանյանը ներկայացրեց հանրակրթության ոլորտի ընթացիկ բարեփոխումները: Գործնական պարապմունքներ կազմակերպվեցին նաև դպրոցի և ուսուցչի հեղինակության բարձրացման, կրթության կառավարման հմտությունների զարգացման, կրթության որակի բարելավման, դպրոցում քաղաքացու դաստիարակության ուղղություններով: Մասնակիցների միջև իրականացվեց առաջավոր փորձի փոխանակում քննարկվող թեմաների շուրջ: Կազմակերպվեց նաև քննարկում <<Ուսուցչի էթիկայի նորմեր>> ուղեցույցի լրամշակված տարբերակի շուրջ՝ ՀՀ ԿԳ նախարարությանը բարելավման առաջարկների փաթեթ ներկայացնելու նպատակով:Քննարկումն իրականացրեց ուղեցույցի համահեղինակ, ԵՊՀ փիլիսոփայության դասախոս, դոցենտ՝ Սիլվա Պետրոսյանը:
