«Դպրոց-կենտրոնների միություն» իրավաբանական անձանց միության առաջարկով Գավառի N5 հիմնական դպրոցում անցկացվեց «Մենք քաջ ազգի զավակներն ենք» խորագիրը կրող տոնական հանդիսություն` նվիրված ՀՀ անկախության 23-ամյակին:
Դպրոցը կարծես մի նոր շունչ էր ստացել. ամենուրեք ծածանվում էին եռագույն դրոշներ, միջանցքը ձևավորված էր պատի թերթերով, բացիկներով և փուչիկներով:
Միջոցառումների շարքը սկսվեց I-IX դասարանների շքերթով: Յուրաքանչյուր դասարան դպրոցի հրապարակ մտավ հայրենասիրական երգերի ներքո` հետաքրքիր մտահղացումներով:
Միջոցառմանը մասնակցում էին Գեղարքունիքի մարզի ԿՄՍ վարչության պետ պարոն Գ. Բադալյանը, ԿՄՍ-ի գլխավոր մասնագետ պարոն Կ. Զազյանը, Արցախյան ազատամարտի մասնակիցներ Հ. Միրիբյանը և Հ. Ղաջոյանը:
Դպրոցի տնօրեն Ս. Արզաքանյանը տոնական օրվա առթիվ ողջունեց ու շնորհավորեց հյուրերին, ծնողներին, աշակերտներին և պատվոգրեր հանձնեց «Լողափնյա հանդբոլ» մարզաձևի հանրապետական մրցումներում երրորդ տեղը գրաված աշակերտներին: Հյուրերը ևս ողջունեցին և շնորհավորեցին Անկախության օրվա առթիվ:
Այնուհետև ներկաները հայոց եռագույնի շուրջ բռնեցին ավանդական շուրջպարը, որի խորհուրդն է լինել միասնական և միասին կերտել մեր անկախ Հայաստանի լուսավոր ապագան: Ապա սկսվեցին սպորտային խաղերը:
Միջոցառումից հետո VII-IX դասարանների աշակերտները այցելեցին Գեղարքունիքի երկրագիտական թանգարան` «Անկախության ուղին» խորագրով լուսանկարների ցուցադրությունը դիտելու: