Ապրիլի 17-ին, երբ նույն օրը և նույն ժամին Հայաստանի Հանրապետության ուսումնական հաստատություններում ընթերցվում ու քննարկվում էր Հայոց ցեղասպանության 100-րդ տարելիցի հռչակագիրը, ՀՀ Գեղարքունիքի մարզի Վարդենիսի N4 հիմնական դպրոցի 6-րդ դասարանում դասղեկի ժամին պատմության ուսուցչուհի Նախշուն Ումիտյանը կազմակերպել էր նույն բովանդակությամբ բաց դաս: 
Աշակերտներն իրենք ընթերցեցին Հռչակագրի դրույթները և ուսուցչուհու օգնությամբ վերլուծեցին ու մեկնաբանեցին դրանք: Ն. Ումիտյանի շնորհիվ դասարանում ստեղծվեց ազատ ու անկեղծ մթնոլորտ, որն էլ նպաստավոր պայման դարձավ անկաշկանդ խոսքի արտահայտման համար: 
Դասի հաջողված լինելն առաջին հերթին ու ամենից շատ պայմանավորված էր Ն. Ումիտյանի հետևողական աշխատանքով, ինչպես նաև Վարդենիսի N4 դպրոցի բարի ավանդույթներով: Այս մասին խոսեց կրթօջախի տնօրենը՝Անահիտ Սահակյանը, իսկ ՀՀ ՊՆ Վարդենիսի կայազորի զինվորական հոսպիտալի զինծառայող, բժիշկ- կապիտան՝ Ազատ Մինասյանը, ով այդ օրը հյուր էր եկել դպրոց ու ներկա գտնվեց բաց դասին, նշեց, որ տպավորված է տեսածով ու լսածով, և առիթը ներկայանալուն պես չի զլանա այդ ամենը հաղորդել իր գերատեսչության ղեկավարությանը: