ՍՈՒՐԵՆԱՎԱՆԻ ՄԻՋՆ. ԴՊՐՈՑԸ ԾԱՂԿԱԶԱՐԴԻ ՄԱՍՆԱԿԻՑ
Մարտի 20-ին Հայաստանյայց Առաքելական Սուրբ Եկեղեցին նշեց Ծաղկազարդը` Հիսուս Քրիստոսի` Երուսաղեմ հաղթական մուտքի տոնը: Այն Ն.Ս.Օ.Տ.Տ. Գարեգին Բ Ծայրագույն Պատրիարք և Ամենայն Հայոց Կաթողիկոսի կողմից տարիներ առաջ հռչակվել է նաև մանուկների օրհնության օր: Այս առիթով Սուրենավանի միջնակարգ դպրոցի շուրջ 30 աշակերտներ՝ ՀԵՊ ուսուցչուհի Ն. Զեյնալյանի նախաձեռնությամբ եկել էին Վեդու Սբ Աստվածածին եկեղեցի՝ իրենց մասնակցությունը բերելու Սուրբ և Անմահ Պատարագին: Ուխտավորների խմբին միացել էին VII դասարանի դասղեկ Հ. Աբրահամյանը, V դասարանի դասղեկ Ա. Ասատրյանը, անգլերենի ուսուցչուհի Հ. Հայրոյանը և Հովհաննես սարկավագ Գալստյանը: Ս. Պատարագի ավարտին, Վեդու Սբ Աստվածածին եկեղեցու հոգևոր հովիվ Տեր Հովակիմ քահանա Հարությունյանը ներկայացրեց օրվա խորհուրդը, ապա կատարեց մանուկների օրհնության կարգ: Արարողության ավարտին Տեր հայրն իր գնահատանքը բերելով եկեղեցում մեկտեղված մանուկներին, մաղթեց, որ Աստծո շնորհն ու ողորմությունը լինի ամենքի հետ և հասկանան իրենց ձեռքում ուռենու ճյուղեր ունենալու խորհուրդն ու կարևորությունը:
