Սուրենավանի միջնակարգ դպրոցն մարտի 30-ին սովորականից մարդաշատ էր: VII դասարանի աշակերտներն իրենց դասղեկ Հ. Աբրահամյանի հետ ձեռնամուխ էին եղել ռազմահայրենասիրական միջոցառման, որը նվիրված էր զոհված ազատամարտիկ Սաշա Հակոբյանի հիշատակին և կրում էր «Անմահության արահետով» խորագիրը: Մինչ միջոցառման մեկնարկը՝ հյուրերը Վեդու Սուրբ Աստվածածին եկեղեցու հոգևոր հովիվ Տեր Հովակիմ քահանա Հարությունյանի առաջնորդությամբ եղան Սաշա Հակոբյանի հուշաքարի մոտ, որտեղ Տեր հայրը կատարեց հոգեհանգստյան կարգ: Օրհնվեցին նաև կրթօջախն ու այն դասարանը, որն անվանակոչվեց Սաշա Հակոբյանի անունով: Միջոցառումն իր շարունակությունը գտավ դպրոցի հանդիսության սրահում: Կենսագրական փաստեր, հուշեր, դրվագներ ու հայրենասիրական ոգով ներծծված բանաստեղծություններ, երգեր: Հանդիսատեսի աչքերում խառնվել էին ցավը, կսկիծն ու հպարտությունը: Ասելիքը շատ էր, մտածելիքը՝ առավել: 
Միջոցառմանը ներկա էին Սուրենավանի զոհված ազատամարտիկների մայրերը, կանայք, ընկերները, ԵԿՄ, Հատուկ գնդի, հասարակական կազմակերպությունների, կրթության և կյանքի տարբեր բնագավառների ներկայացուցիչներ: 
Միջոցառման վերջում հնչած ելույթները լեցուն էին շնորհակալությամբ, որոնք ուղղված էին դպրոցի տնօրեն Վ. Ավետիսյանին, միջոցառման կազմակերպիչ Հ. Աբրահամյանին ու մասնակից աշակերտներին: 
Արարատի ԵԿՄ նախագահ Տ. Գարեգինյանը իր խոսքից հետո «Հայաստանի երկրապահ» հուշամեդալով պարգևատրեց զոհված ազատամարտիկների մայրերին, կանանց, իսկ Հատուկ գնդի վետերանների միության նախագահ Գ. Հակոբյանը և «Փառքի տարածք» հուշահամալիր հկ նախագահ Է. Միրզոյանը հուշամեդալներ, պատվոգրեր ու շնորհակալագրեր հանձնեցին տնօրեն Վ. Ավետիսյանին, կազմակերպիչ Ա. Ղազարյանին ու պատմության ուսուցչուհի Հ. Աբրահամյանին՝ մատաղ սերնդի կրթության ու ռազմահայրենասիրական ոգով դաստիարակելու համար: