«Ի՞նչ, որտե՞ղ, ե՞րբ».15-րդ փառատոն

Ի՞նչ- «Ի՞նչ, որտե՞ղ, ե՞րբ» խաղի Նոյեմբերյանի տարածաշրջանային աշակերտական 15-րդ փառատոն.
Որտե՞ղ- Նոյեմբերյանի ավագ դպրոցում.
Ե՞րբ - Ապրիլի 12-ին` ժամը 12.00-ին:

Այս էլ տասնհինգերորդ տարին է` գարնան գալստյան հետ «ապրիլի 12-ի» սպասումով են համակվում Նոյեմբերյանի տարածաշրջանի շուրջ 20 դպրոցների պատանի գիտակները: Փառատոնը կազմակերպողները` Նոյեմբերյանի ավագ դպրոցը և Նոյեմբերյանի ինտելեկտուալ կրթության ակումբը /ՆԻԿԱ/, ամեն ինչ անում են, որպեսզի նրանց համար այդ օրը դառնա գիտելիքի, մտքի և երևակայության անմոռաց օր: Հոբելյանական 15-րդ փառատոնը նվիրված էր տիեզերքի նվաճման 55 –րդ տարելիցին: Սակայն ապրիլյան քառօրյա պատերազմը, բնական է, որ իր արտացոլումը պետք է գտներ հարցաշարը կազմելիս: Իսկ ընդմիջումների ժամանակ պատանի գիտակները երգում էին ազգային- ազատագրական երգեր, ասմունքում էին: Հերթական 15-րդ փառատոնին մասնակցեցեին 16 համայնքների 19 թիմերի շուրջ 120 գիտակներ: 
Համառ, անզիջում պայքարում այս էլ երրորդ անգամ հաղթող ճանաչվեց Բերդավանի դպրոցի «Նեմեսիս» թիմը, որը տեր դարձավ նաև փոխանցիկ գավաթին: Երկրորդ տեղում կրկին Բերդավանն էր՝ իր « Բերդ» թիմով: Երրորդ մրցանակին արժանացավ Կողբի թիվ 2 դպրոցի «Նժդեհ»թիմը: Փառատոնի լավագույն խաղացող ճանաչվեց «Նեմեսիս» թիմի ավագ Էրիկ Էզդանյանը: 
Ավանդաբար փառատոնին մասնակցող Նոյեմբերյանի N զորամասի զինվորների թիմը ցավոք սրտի, հասկանալի պատճառներով, չկարողացավ մասնակցել: Այնուհանդերձ, զինվորների համար նախատեսված նվերները և զորակից ողջույնները հանձն առավ հասցեատերերին փոխանցել զորամասի ներկայացուցիչը: