ԱՆՎԱՆԱԿՈՉՈՒՄ ՍՈՒՐԵՆԱՎԱՆԻ ՄԻՋՆ. ԴՊՐՈՑՈՒՄ
Սուրենավանի միջնակարգ դպրոցի ՀԵՊ դասարանն անվանակոչվեց Ամենայն Հայոց 130-րդ կաթողիկոս Վազգեն Ա Պալճյանի անունով
Մայիսի 12-ին Սուրենավանի միջնակարգ դպրոցի ՀԵՊ դասարանն անվանակոչվեց Ամենայն Հայոց 130-րդ կաթողիկոս Վազգեն Ա Պալճյանի անունով: Անվանակոչությանը ներկա էին Մայր Աթոռ Ս. Էջմիածնի ՔԴԿ տնօրեն Գերաշնորհ Տ. Վարդան եպս. Նավասարդյանը, Արարատի փոխմարզպետ պրն. Ի. Շադյանը, Արժ. Տ. Հովակիմ քհն. Հարությունյանը, Տ. Դավիթ քհն. Սահակյանը, Բրշ. Սերոբ սրկ. Իսախանյանը, Հայկ սրկ. Տերտերյանը, Արարատի տ/շ ՔԴԿ պատասխանատու Մինաս Հովակիմյանը, Արարատի կրթության վարչության աշխատակից Անահիտ Խուդավերդյանը, հյուրեր, ուսուցիչներ ու աշակերտներ: Դասասենյակի բացումը կատարեցին փոխմարզպետ Ի. Շադյանն ու Սուրենավանի միջնակարգ դպրոցի տնօրեն Վ. Ավետիսյանը, որից հետո հոգևոր այրերը կատարեցին օրհնության կարգ: Օրհնության կարգից հետո հյուրերը դպրոցի դահլիճում ներկա եղան Շինարար Հայրապետին նվիրված գողտրիկ միջոցառման, որը կազմակերպել էր նույն դպրոցի ՀԵՊ ուսուցչուհի Նաիրա Զեյնալյանը: Կենսագրական փաստերին, աշակերտների սահուն խոսքին, գեղեցիկ շարականներին լրացնում էր նաև խոսուն սալիկաշարը: Տրամադրող ու հոգեթով մթնոլորտն իր մեջ էր առել ներկաներին ու քայլ առ քայլ թերթել էր տալիս Վեհափառի կյանքի էջերը: Միջոցառման վերջում շնորհակալական խոսքով հանդես եկան Արարատի փոխմարզպետ Ի. Շադյանը, դպրոցի տնօրեն Վ. Ավետիսյանը, իսկ ՔԴԿ տնօրեն Գերաշնորհ Տ. Վարդան եպս. Նավասարդյանը իր պատգամը փոխանցեց ներկաներին՝ մասնավորաբար գնահատելով դպրոցի տնօրեն Վ. Ավետիսյանին և ՀԵՊ ուսուցչուհի Ն. Զեյնալյանին:
