«Դպրոց-կենտրոնների միություն» իրավաբանական անձանց միության առաջարկով Մյասնիկյանի միջնակարգ դպրոցում 2014թ-ի ապրիլի 24-ին տեղի ունեցավ ցերեկույթ՝ նվիրված Մեծ եղեռնի 99-ամյակին: Միջոցառման ընթացքում աշակերտները նշեցին բոլոր այն երկրների անունները, որոնք ճանաչել են հայոց ցեղասպանությունը: Նրանք հանդես եկավ դիմում-բողոքով՝ ուղղված թուրքական կառավարությանը՝ ցեղասպանության 100-ամյա տարելիցին ընդառաջ այն ճանաչելու և փոխհատուցումներ կատարելու պահանջով:
Աշակերտները հորդորում են ՀՀ հանրակրթական դպրոցների աշակերտներին՝ միանալու իրենց պահանջին, որը հիմք է դնելու ցեղասպանության 
100-ամյակին ընդառաջ միջոցառումների շղթայի կազմակերպմանը: 

                             Դիմում-բողոք
Ես՝ Մյասնիկյանի Արայի անվան միջնակարգ դպրոցի աշակերտական խորհրդի նախագահ Ժաննա Արամի Կիրակոսյանս, լիազորված եմ մեր դպրոցի աշակերտների անունից ներկայացնելու դիմում-բողոք:
Բողոքն ուղղում եմ Թուրքիայի կառավարությանը՝ մեր պատմությունը խեղաթյուրելու ու ժողովրդիս ծվատելու, մեր պատմությունը արնոտելու ու ազգիս քառատելու, հայրենիքս խոշտանգելու և ազգիս հայրենազրկելու կապակցությամբ:
Բողոքի ալիքը մեծ է, շա՛տ մեծ, բայց այն կարող է հանդարտվել թուրքական կառավարության ինքնագիտակցության, արժանապատվության, պատվախնդրության արթնացման դեպքում միայն:
Դիմում-բողոքը հղում եմ աշխարհի բոլոր երկրների դեսպաններին՝
-Նայե՛ք արդարության աչքերին և միացե՛ք մեր երթին, որի կարգախոսն է ՝ ո՛չ համիդներին, ո՛չ թալյաթներին, ո՛չ քեմալներին, ո՛չ պանթուրքիզմին, ո՛չ պանիսլամիզմին, ո՛չ ռասսիզմին և ժխտողականությանը…
Պահանջը կա և կլինի այնքան ժամանակ, մինչև Թուրքիան կընդունի ցեղասպանության փաստը և կտա հատուցում:
Բողոք-դիմումը հաստատված է Մյասնիկյանի Արայի անվան միջնակարգ դպրոցի աշակերտական խորհրդի կողմից: