Հայրենասիրությունը հայի գենի մեջ է... Այսօրվա մեր դասն էլ հայրենասիրության ու նվիրումի մի վառ օրինակ էր: Միջոցառման նպատակն էր ամփոփել ՀՀ և Հայոց բանակի 25-ամյա տարեդարձներին նվիրված միջոցառումների շարքը: Մեզ հետ էին օրերս զորացրված, Քառօրյա պատերազմի բովով անցած մեր շրջանավարտները, ովքեր պարտադիր զինծառայության շրջանում Հայրենիքի սահմանները պաշտպանելու և դպրոցում ստացած ռազմահայրենասիրական դաստիարակությանը հավատարիմ մնալու համար պարգևատրվեցին դպրոցի տնօրենի շնորհակալագրերով: Դպրոցի զինղեկ գնդապետ Անդրանիկ Ասատրյանն էլ Հայոց բանակի 25-ամյակի կապակցությամբ Կենտրոն վարչական շրջանի ղեկավար Արա Սադոյանի կողմից ստացավ պատվոգիր` սովորողների ռազմահայրենասիրական դաստիարակության գործում ավանդ ունենալու համար: Միջոցառումն իրենց ներկայությամբ պատվել էին ԱԺ փոխնախագահ Հերմինե Նաղդալյանը, ԱԺ պատգամավոր Մարգարիտ Եսայանը, Կենտրոն վարչական շրջանի ղեկավար Արա Սադոյանը, Երևանի ավագանու անդամ Նաիրա Նահապետյանը, Կենտրոնի զինկոմ Սերոբ Արմենակյանը, դպրոցի կառավարման խորհրդի նախագահ Արսեն Հակոբյանը: