«Թումանյանը անմահ է, քանզի սերունդները նրան հիշելու են դարեր: Նա հայ հանճարի փայլատակումն է, հայ ժողովրդի մտքի ու հույզերի խտացված կերպարը, մեր ազգային նկարագիրը»: Փետրվարի 20-ին ՝ Ամենայն հայոց բանաստեղծ Հովհաննես Թումանյանի ծննդյան 148-ամյակին և գիրք նվիրելու օրվան նվիրված ՝ Մ.Նալբանդյանի անվան հ.33 հիմնական դպրոցում պատրաստել էին յուրօրինակ միջոցառում ՝ «Թումանյանը մեր աչքերով» խորագիրը կրող ցուցահանդես-տոնավաճառ,որի հասույթը տրամադրվելու է սահմանամերձ գոտու աշակերտներին՝ գրենական պիտույքների տեսքով : Նախասրահում հյուրերին դիմավորեցին 7-9-րդ դասարանի աշակերտները, որոնք դարձել էին գրական դեմքեր՝ սրտի խոսքեր հղելով մեծ բանաստեղծին: Կատարեցին Թումանյանի երգվող ստեղծագործությունները՝ « Լուսավորչի կանթեղը», պարեցին «Ամպի տակիցը»: Գիքորի Էստի համեցե՜ք, Էստի համեցե՜ք խոսքերի ներքո հյուրերին ուղեկցեցին դահլիճ, որտեղ նրանց դիմավորեցին Երևանի Կենտրոն վարչական շրջանի «Մանկապատանեկան ստեղծագործության և գեղագիտական դաստիարակության կենտրոն»-ի պարային խմբակի սաները՝ «Կինտոների պարով»: 1-4-րդ դասարանի աշակերտները ներկայացրին Թումանյանի հեքիաթները. երեխաներն իրենք էին ընտրել թեմաները և պատրաստել աշխատանքներ տոնավաճառի համար, որին իրենց մասնակցությունն էին ունեցել ծնողները: 1-4-րդ դասարանի շակերտներին նույնպես սպասվում էր անակնկալ. նրանց հյուրն էր հենց ինքը` Ամենայն հայոց բանաստեղծ Հովհաննես Թումանյանը: Վերջում Թումանյանը իր սրտի խոսքը հղեց՝հեքիաթները անդունդներ են՝ խորը, անծայր, անվերջ: Ես իմ հեքիաթներով ձգտել եմ ձեր մեջ, սիրելի՛ մանուկներ, զարգացնել սեր ու բարություն, քաջություն ու լավատեսություն, որպեսզի ստեղծեք առողջ և համերաշխ հասարակություն: Թումանյանը միշտ էլ կմնա անցյալ, ներկա և ապագա սերունդներին կապող օղակ»