15.03.2017թ. Հրազդանի Հ. Օրբելու անվան N13 ավագ դպրոցում արտասովոր եռուզեռ էր, համադպրոցական ընտրություններ էին: Աշակերտներն ընտրում էին «Դպրոցի զարգացման ծրագիր» ներկայացրած լավագույն թեկնածուին: Բոլորը մտահոգված էին. Ներկայացված հինգ թեկնածուներից ո՞վ կընտրվի և ու՞մ ծրագիրը կհաղթի: Անհանգստությունը համատարած էր: Առաջին անգամ են ընտրում, և իրենց ձայնից է կախված ծրագրի ճիշտ ընտրությունը: Դպրոցն ընդգրկված էր «Առաջին անգամ ընտրող» ծրագրին, որն իրականացնում էր ԵԽ-ի Քաղաքական դասընթացների երևանյան դպրոցը: Ծրագրի նպատակն էր աշակերտներին ներկայացնել ժողովրդավարական ընտրությունների տեսությունն ու գործնական կողմերը՝ գործընթացի տարբեր փուլերում, ցույց տալ աշակերտներին, թե ինչպես են ընթանում ժողովրդավարական ընտրությունները, և որ դրանք կարող են տեղի ունենալ ոչ միայն ազգային կամ տեղական մակարդակներում՝ խորհրդարան ու կառավարություն ընտրելիս, այլև իրենց դպրոցում: Դպրոցում ծրագիրն իրականացրին պատմության և հասարակագիտության ուսուցչուհի Լ. Փիրումյանը և կազմակերպիչ Ս. Մարկոսյանը: