2017թ. հուլիսի 1-ին տեղի ունեցավ Դպրոց-կենտրոնների միության արտագնա նիստը Գեղարքունիքի մարզում՝ ՀՀ Գեղարքունիքի մարզպետ Կարեն Բոթոյանի բարձր հովանու ներքո, որի համար մեր խորին երախտագիտությունն ենք հայտնում:Դպրոց-կենտրոնների միության կողմից հուշանվերներ և շնորհակալագրեր հանձնվեցին կազմակերպիչներին՝ շնորհելով ՙՙՊատվավոր անդամ՚՚-ի կոչում Կարեն Բոթոյանին և ՙՙԼավագույն գործընկերոջ՚՚ կոչում Գեղարքունիքի մարզի կրթության վարչության պետ Գարիկ Բադալյանին:
Նիստին մասնակցում էին Դպրոց-կենտրոնների միության անդամ դպրոցների տնօրեններ ՀՀ տարբեր մարզերից և Երևանի քաղաքապետարանի կրթության վարչության պետ Աննա Ստեփանյանը: Մեզ ընդունեց Գեղարքունիքի փոխմարզպետ Անդրանիկ Հակոբյանը, որը կարևորեց Դպրոց-կենտրոնների միության գործունեությունը: Բավականին արդյունավետ քննարկում անցկացրեց Գարիկ Բադալյանը: Քննարկվեցին հանրակրթության մի շարք հիմնախնդիրներ՝ դպրոցի ֆինանսավորման նոր բանաձևի նախագիծը, ուսուցչի թափուր տեղի մրցույթի կարգը, դպրոցի աշխատողների պաշտոնների նկարագրերի բացակայության և այլ հարցեր: Ակտիվ աշխատանքից հետո մեզ սպասվում էր օրհնության արարողություն Գավառի Սուրբ Աստվածածին եկեղեցում և նավով շրջապտույտ Սևանա լճի վրա: 
Շնորհակալություն Գեղարքունիքի մարզպետ Կարեն Բոթոյանին և մյուս կազմակերպիչներին: Ամեն ինչ կազմակերպված էր գերազանց: Հաջորդ արտագնա նիստը կլինի ՀՀ մեկ այլ մարզում, որին անհամբերությամբ սպասում են բոլորը: