«Գիտելիքը կերտում է մարդուն». այս խորագիրն էր կրում սեպտեմբերմեկյան միջոցառումը Երևանի հ.159 ավագ դպրոցում: Դպրոց նոր ընդունված տասներորդցիների համար Սեպտեմբերի մեկը վերածվեց իսկական տոնակատարության՝ համեմված երգ ու պարով, ջերմ և սրտաբուխ խոսքերով, բարձրաստիճան հյուրերի՝ շնորհավորանքի ու բարեմաղթանքի ուղերձներով: Միջոցառմանը ներգրավված էին թե՛ աշակերտները, թե՛ ծնողները, թե՛ 2017-18 ուստարվա շրջանավարտները և թե՛ աշխորհուրդը:Վերջինս հանդես եկավ դպրոցի անցած ուղու մասին համառոտ ակնարկով՝ նշելով, որ իրենք մեծ պատվով են կրում «159-ի աշակերտ» կոչումը: Նրանց ելույթին հաջորդեց 2017-18 ուստարվա շրջանավարտների խոսքը. 10-րդցիներին հանձնեցին արդեն ավանդույթ դարձած բարեմաղթանքի ուղերձը: Երախտագիտության և սրտաբուխ, ջերմ խոսքով հանդես եկավ դպրոցի ԾԽ-ի անդամ Լիլիթ Սարգսյանը, ով իր խոնարհումը հղեց տնօրենին, մանկավարժներին՝ նրանց կատարած բոլորանվեր աշխատանքի համար: Դպրոցի բակում թևածում էին ուրախությունը, երգը, թնդում էր ազգային քոչարին՝ հավաստելով, որ հայը բոլո՛ր ժամանակներում է անպարտելի, հաղթական ու զորավոր: Միջոցառումը եզրափակվեց համայն հայության հանգրվան Երևանի 2800-ամյակին նվիրված երգ-պարով, ապա, ավանդույթի համաձայն, 10-րդցիները իրենց հարգանքի տուրքը մատուցեցին Արցախյան ազատամարտում ընկած դպրոցի շրջանավարտների և բյուր նահատակների հիշատակին ՝ խոնարհվելով և ծաղիկ դնելով նրանց սխրանքն անմահացնող խաչքար-հուշարձանի մոտ, որը, խոյանալով դպրոցի բակում, ուրույն սրբավայր է դարձել: Միջոցառումն ամփոփվեց արիության դասով, որն անցկացվեց դասղեկների կողմից: