2014թվականի  սեպտեմբերի 26-29-ը ք.Ծաղկաձորի «Գրողների ստեղծագործական տուն» հյուրանոցային համալիրում իրականացվել է «Ներդպրոցական վերահսկողության պլանավորում և իրականացում» թեմայով քառօրյա սեմինար: Սեմինարին մասնակցում էին ՀՀ հանրակրթական ուսումնական հաստատության տնօրեններ, տնօրենի ուսումնական աշխատանքների գծով տեղակալներ:
Դասընթացի բացման արարողությանը հրավիրված էին բազմաթիվ հյուրեր՝ ՀՀ ԱԺ գիտության, կրթության, մշակույթի, երիտասարդության և սպորտի հանձնաժողովի նախագահ Արտակ Դավթյանը,  ՀՀ ԿԳՆ հանրակրթության վարչության պետ Նարինե Հովհաննիսյանը, ԿԳՆ հանրակրթության վարչության նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանը, ՀՀ ԿԳՆ «Կրթական ծրագրերի կենտրոն» ԾԻԳ-ի տնօրեն Հասմիկ Ղազարյանը, ուսուցիչների մասնագիտական զարգացման և վերապատրաստման  ենթածրագրի ղեկավար  Կարեն Մելքոնյանը, Չինաստանի Դալյան քաղաքի օտար լեզուների համալսարանի ռուսաց և օտար լեզուների ֆակուլտետի դեկան Փընգ ՎՆՃԱՕ-ն, Երևանի Վ. Բրյուսովի անվ. պետական լեզվաբանական համալսարանի Կոնֆուցիուսի ինստիտուտի տնօրեն Նաիրա Գրիգորյանը, «Դպրոց-կենտրոնների միություն» ԻԱՄ-ի ցանցի անդամ հանդիսացող ՀՀ հանրակրթական ուսումնական հաստատության տնօրեններ, տնօրենի ուսումնական աշխատանքների գծով տեղակալներ, և կրթության ոլորտի այլ պատասխանատուներ:
Բացման խոսքով հանդես եկավ նաև «Դպրոց-կենտրոնների միություն» ԻԱՄ-ի նախագահ, Աժ պատգամավոր Ռուզաննա Մուրադյանը: Նա ներկայացրեց սեմինար-քննարկման հիմնական թեմաները: Միության նախագահի խոսքով՝ Դպրոց-կենտրոնների միությանն անդամակցում են իրենց փորձով հանրապետությունում լավագույնը ճանաչված տարբեր դպրոցներ: Նշեց, որ միությունն իրենից ներկայացնում է շարժուն, գործող, անընդհատ զարգացող համակարգ: Նա նաև ավելացրեց, որ ներկաները պետք է ոչ միայն թելադրող լինեն համակարգում, այլև իրենց փորձով մասնակցեն բոլոր խնդիրների լուծմանը: 
ԱԺ պատգամավոր Արտակ Դավթյանը, ողջունելով դասընթացի մասնակիցներին, իր խոսքում նշեց, որ շատ է կարևորում կրթական խնդիրների քննարկումն ու վերհանումը Դպրոց-կենտրոնների միության կողմից: Ըստ պատգամավորի՝ պետական մարմինների կապը դպրոցների հետ պետք է ամուր լինի, որպեսզի համատեղ ջանքերով գտնվեն խնդիրների լուծման լավագույն մեխանիզմները:
Պարոն Դավթյանն ընթերցեց ԱԺ նախագահ Գալուստ Սահակյանի ուղերձը, որում մասնավորապես ասվում է. «Դպրոց-կենտրոնների միության հարգելի՛ անդամներ, ողջունում եմ սեմինարի մասնակիցներին, մաղթում եմ ստեղծագործական և բեղմնավոր աշխատանք: Կարևորում եմ Դպրոց-կենտրոնների միության գործունեությունը, որը գործուն հարթակ է մանկավարժների շարունակական մասնագիտական զարգացման, դպրոցներում նորարությունների, փորձի փոխանակման և առաջարկվող փորձի տարածման համար: ՀՀ բոլոր մարզերի դպրոցների միջև ակտիվ համագործակցությունն ապահովող այս կառույցին մաղթում եմ գործունեության շարունակականություն և զարգացում» (մեջբերում ուղերձից):
ՀՀ ԿԳՆ հանրակրթության վարչության պետ Նարինե Հովհաննիսյանը, ողջունելով սեմինարի մասնակիցներին, իր խոսքում նշեց, որ շատ է կարևորում Դպրոց-կենտրոնների միության գործունեությունը կրթության ոլորտում: Սեմինարին անդրադառնալով՝ նա նաև հավելեց, որ ակնկալում է արդյունավետ քննարկում ՀՀ հանրակրթական ուսումնական հաստատություններում կրեդիտային համակարգի ներդրման և այդ հայեցակարգի բարելավման ուղությամբ:
Ելույթ ունեցավ նաև ԿԾԳ Ծրագրերի իրականացման գրասենյակի տնօրեն Հասմիկ Ղազարյանը. ով իր խոսքում նշեց, որ ԴԿՄ ԻԱՄ-ը ակտիվ գործունեություն է ծավալում՝ իրականացնելով բազմաթիվ կրթական ծրագրեր հանրակրթության ոլորտում:
Ելույթի խոսքով հանդես եկան նաև ԿԳՆ հանրակրթության վարչության նախադպրոցական և միջնակարգ կրթության քաղաքականության մշակման և վերլուծության բաժնի պետ Սյուզաննա Մակյանը և ՀՀ ԿԳՆ «Կրթական ծրագրերի կենտրոն» ԾԻԳ-ի ուսուցիչների մասնագիտական զարգացման և վերապատրաստման  ենթածրագրի ղեկավար  Կարեն Մելքոնյանը:
Ներկաներին ողջունեց նաև Չինաստանի Դալյան քաղաքի օտար լեզուների համալսարանի ռուսաց և օտար լեզուների ֆակուլտետի դեկան Փընգ Վնճաօ-ն: Նա ներկայացրեց Չինաստանի համալսարանի համագրծակցությունը տարբեր երկրների կրթական հաստատությունների միջև և ընդգծեց, որ պետք է զարգացնել և խթանել երկկող արդյունավետ համագործակցությունը Կոնֆուցիուսի ինստիտուտի և «Դպրոց-կենտրոնների միություն» ԻԱՄ-ի միջև՝ նպաստելով համատեղ արդյունավետ համագործակցությանը կրթութության կազմակերպման ոլորտում կողմերի ձեռք բերված փորձի փոխանակման շրջանակներում:
Այնուհետև Երևանի Վ. Բրյուսովի անվ. պետական լեզվաբանական համալսարանի Կոնֆուցիուսի ինստիտուտի և «Դպրոց-կենտրոնների միություն» ԻԱՄ-ի միջև ստորագրվեց համագործակցության հուշագիր:
Բացման արարողությանը հաջորդած 3 օրերի ընթացքում սեմինարի մասնակիցներն իրենց աշխատանքները շարունակեցին խմբերում: Մասնակից ՀՀ հանրակրթական ուսումնական հաստատությունների տնօրենները, տնօրենի ուսումնական աշխատանքների գծով տեղակալները փաստեցին այս սեմինարի կարևորությունը և ցանկություն հայտնեցին , որ իրենց մասնագիտական զարգացմանն ուղղված նմանատիպ դասընթացները լինեն շարունակական: