ՄԵԹՈԴԱԿԱՆ ՁԵՌՆԱՐԿՆԵՐԻ ՇՆՈՐՀԱՆԴԵՍ
Ս/թ հոկտեմբերի 25-ին Թեքեյան կենտրոնում տեղի ունեցավ «Դպրոց-կենտրոնների միություն» ԻԱՄ-ի կողմից կազմակերպված «Դպրոցի զարգացման ծրագիր» ուղեցույցի և «Ուսուցչի էթիկայի նորմեր» ձեռնարկի շնորհանդեսը:
Միջոցառմանը ներկա էին ՀՀ ԱԺ պատգամավորներ, Երևանի ու մարզերի կրթության վարչության ներկայացուցիչներ, դպրոցների տնօրեններ, տնօրենի ուսումնական աշխատանքների գծով տեղակալներ և կրթության ոլորտի այլ ներկայացուցիչներ:
Բացման խոսքով հանդես եկավ ՀՀ ԱԺ պատգամավոր, «Դպրոց-կենտրոնների միություն» ԻԱՄ-ի նախագահ Ռուզաննա Մուրադյանը, ով հյուրերին ներկայացրեց միության անցած ուղին, ծրագրերն ու խնդիրները` անդրադառնալով կրթության ոլորտում առկա հիմնախնդիրներին:
Անդրադառնալով «Դպրոցի զարգացման ծրագիր» և «Ուսուցչի էթիկայի նորմեր» մեթոդական ձեռնարկներին` ՀՀ ԱԺ պատգամավոր Ռուզաննա Մուրադյանը նշեց, որ գրքերն ի սկզբանե պահանջված են հանրակրթության ոլորտում: Նրա խոսքով՝ դպրոցի աշխատանքային պլանավորումը հիմնականում ուշադրություն է դարձնում դպրոցի ընթացիկ խնդիրների լուծմանը, իսկ զարգացման ծրագիրը հանդես է գալիս որպես դպրոցի ռազմավարության պլանավորում:
Շնորհանդեսի ընթացքում ողջույնի խոսքով հանդես եկան Ազգային ժողովի փոխխոսնակ Հերմինե Նաղդալյանը, ՀՀ ԱԺ պատգամավոր ՀՀԿ խմբակցության ղեկավար Վահրամ Բաղդասարյանը, ՀՀ ԿԳՆ հանրակրթության վարչության պետ Նարինե Հովհաննիսյանը, Գնահատման և թեստավորման կենտրոնի տնօրեն Գագիկ Մելիքյանը, Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Հայր Վարդան Նավասարդյանը, ՀՀ ԿԳՆ «Կրթական ծրագրերի կենտրոն» ԾԻԳ-ի ուսուցիչների մասնագիտական զարգացման և վերապատրաստման ենթածրագրի ղեկավար Կարեն Մելքոնյանը, ձեռնարկների հեղինակային խմբերի անդամներ և այլ կրթագետներ ու փորձագետներ:
ՀՀ ԱԺ պատգամավոր Վահրամ Բաղդասարյանը, շնորհավորելով ձեռնարկների հեղինակներին, նշեց, որ նմանատիպ ձեռնարկների տպագրությունն անհրաժեշտություն է, քանի որ երկրի և պետության զարգացման հիմքում ընկած է դպրոցը:
Շնորհանդեսի ընթացքում մասնակիցներին ներկայացվեցին ձեռնարկների կառուցվածքն ու բովանդակությունը:
