Օրերս Գավառի N5 հիմնական դպրոցում ուսուցիչների և աշակերտների մասնակցությամբ տեղի ունեցավ հետաքրքիր միջոցառում՝ նվիրված Կոմիտասի ծննդյան 145-ամյա հոբելյանին: Այն կազմակերպել էր հայոց լեզվի և գրականության ուսուցչուհի Աստղիկ Բոստանչյանը: V-IX դասարանի աշակերտները հետաքրքիր դրվագներ ներկայացրին Կոմիտասի կյանքից՝ այն համադրելով հայ ժողովրդի պատմության ամենաողբերգական էջերի հետ: «Անլռելի զանգակատուն» պոեմից ընտրված հատվածների հուզիչ արտասանությամբ աչքի ընկան Սոնյան, Գրիգորը, Ժենյան, Վազգենը, Լիանան, Աստղիկը, Մարիաննան և ուրիշներ: Դպրոցի փոքրիկ երգչախմբի կատարմամբ  (խմբավար՝ Ս. Բոստանչյան) ունկնդիրները վայելեցին Կոմիտասի  «Գարուն ա»-ն ու «Կաքավիկը», «Շողեր ջան»-ն ու «Սոնա յարը», «Քելե, քելե»-ն ու «Չինար ես»-ը: «Կռունկ» երգի գեղեցիկ կատարմամբ բոլորին հուզեց երգ-երաժշտության ուսուցչուհի Սիրանուշ Բոստանչյանը:

Կոմիտասի դիմանկարները ինքնատիպ էր ներկայացրել V դասարանի շնորհալի աշակերտուհի Էմմա Գրիգորյանը:

Վերջում ելույթ ունեցավ դպրոցի տնօրեն Ս. Արզաքանյանը, որը շնորհակալություն հայտնեց աշակերտներին հետաքրքիր և բովանդակալից միջոցառման համար: