Սույն թվականի նոյեմբերի 25-ին Կարբիի Վ. Թեքեյանի անվան միջնակարգ դպրոցում սահյանական մթնոլորտ էր տիրում: 
Իններորդ դասարանի աշակերտներն ու աշակերտուհիները մեծ սիրով տոնում էին բանաստեղծի հարյուրամյա հոբելյանը: Իրենց ուսուցչուհու՝ Վ. Հովհաննիսյանի և դասղեկի՝ Լ. Հովհաննիսյանի առաջնորդությամբ նրանք կազմակերպել էին 20-րդ դարի հայ ազգային, խոհափիլիսոփայական պոեզիայի երևելի ներկայացուցիչներից մեկի՝՝ Համո Սահյանի պոեզիային և կյանքին նվիրված ցերեկույթ: Ոգեշնչված լինելով մեծ բանաստեղծի պոեզիայով՝ աշակերտները գրեթե անթերի ներկայացրեցին նրա՝ հայրենի բնաշխարհի ու մարդու նկատմամբ անհուն սերը՝ բնապատկերների գեղարվեստական ողջ բազմազանությամբ՝ այսպիսով ցերեկույթը վերածելով մի յուրօրինակ բաց դասի: Իսկ նրա բանաստեղծությունների հիման վրա գրված երգերը ավելի հոգեհարազատ էին դարձրել սահյանական աշխարհը աշակերտներին, քանզի նրանք մեծ սիրով և վարպետությամբ էին կատարում դրանք: 
Ինչպես գրում է մեծ պոետը «Բանաստեղծը մարդու միտքը հղկելով, բյուրեղացնելով, նրան կապում է տիեզերքին, սովորեցնում ապրել մեծ կյանքով»:
Ցերեկույթի մասնակիցները խոստովանեցին, որ լիարժեք վայելեցին յուրաքանչյուր պահը՝ տեղափոխվելով սահյանական աշխարհը և վերապրելով պատանեկության տարիների առաջին սիրո վերհուշը՝ իրենց զգալով բանաստեղծի ոչ իրական, սակայն կենդանի աշխարհում: