Կրկին տոն Վարդենիսի N 4 հիմնական դպրոցի հարկի տակ:
Այն բացառիկ էր, քանի որ նրան տոն տվողները այս դպրոցի ամենակրտսեր սաներն էին՝ նախակրթարանի փոքրիկները : Անհամբերությամբ լեցուն են նրանց հայացքները, հարցական շեշտեր ու երկմտանք կա ծնողների հայացքներում. մի՞թե այս կարճ ժամանակում նրանք այսքան աճել են ու մեծացել: Մինչդեռ ինքնավստահ են նրանց առաջին դաստիարակներ` Արմիկ Եղեյանը և Աննա Գասպարյանը:
Այս պահին նրանք դարձել են փոքրիկ – փոքրիկ արևիկներ, արտասանում են, ուրախ երգում ու իրենց կերպարներով ասում հանելուկներ,շուտասելուկներ:Չնայած դրսում ձյուն էր,բայց փոքրիկները հիշեցնում են, որ տաք ու շողացող արևը կջերմացնի ամենուր: Փոքրիկները բոլորին հիշեցրին, թե որքան մեծ դեր ունի առաջին հանդեսն իրենց կյանքում: Աշնան տոնն ավարտվեց փոքրիկ դերասան դարձած նախակրթարանի սաների «Կիկոսի մահը» ներկայացումով: Երեխաները մեկ անգամ ևս հաստատեցին, որ թեև նրանք փոքրիկներ են, սակայն անվարան կարելի է իրենց վստահել: Իր ստացած տպավորությունները ներկաների հետ կիսեց դպրոցի տնօրենը` տիկին Սահակյանը: Նա գովեստի խոսքեր ուղղեց սաներին և դաստիարակներին` ասելով, որ սպասելիքներն ու ակնկալիքները շատ են:
Այս ուրախ ու չքնաղ Աշնան տոնը մտավ Վարդենիսի N 4 հիմնական դպրոցի պատմության գիրկը և դարձավ մնայուն ու անփոխարինելի մի էջ :