ՄԻՋՈՑԱՌՈՒՄ՝ ՆՎԻՐՎԱԾ Հ. ՍԱՀՅԱՆԻ 100-ԱՄՅԱԿԻՆ ՍՈՒՐԵՆԱՎԱՆԻ ՄՒՋՆ. ԴՊՐՈՑՈՒՄ
Օրերս Սուրենավանի միջնակարգ դպրոցում XI Ա դասարանի աշակերտների մասնակցությամբ Համո Սահյանի 100-ամյակին նվիրված միջոցառում էր, որը կազմակերպել էր հայոց լեզվի և գրականության, հայոց եկեղեցու պատմության երիտասարդ ուսուցչուհի Նաիրա Զեյնալյանը: Գյուղական կոլորիտ, ջերմ մթնոլորտ, սահյանական տողերով գրված երգեր, գեղեցիկ պարային կատարում ու բանաստեղծություննե՜ր-բանաստեղծություննե՜ր: Սալիկահանդեսի միջոցով էջ առ էջ բացվեց ու ցոլացավ Սահյանը՝ իր ծնունդով, ծննդավայրով, գերդաստանով, ընտանիքով, ապրած տարիներով և միայն ու միայն իրեն հատուկ ուղեկիցներով: Ուսուցչուհին հմտությամբ էր ընտրել բանաստեղծությունները: Ասմունքելու վարպետ լինելով՝ կարողացել էր ասմունքելու շնորհ ներարկել աշակերտների մեջ և ասելիքը ճիշտ տեղ հասցնել: Չզգացինք՝ ինչպես անցավ ժամանակը, կուզեինք այն երկարեր, քանի որ միջոցառումը հոգեպարար երաժշտության նման կլանեց բոլորիս, հուզեց ու ապրեցրեց: Վերջում յուրաքանչյուրս մեր ապրումի համար հանդես եկանք անհատական շնորհակալությամբ՝ ուղղված ուսուցչուհուն և աշակերտներին՝ այս խառն ու խրթին աշխարհում մեր օրերից մեկը արվեստի տոն դարձնելու համար:
Մ. Մուրադյան/Հ. լեզվի և գրակ. ուսուցչուհի/
