Դեկտեմբերի 3-ին Սուրենավանի միջնակարգ դպրոցի VIII դասարանում Հայոց եկեղեցու պատմություն առարկայի ուսուցչուհի Նաիրա Զեյնալյանը հանդես էր եկել ինքնատիպ նախաձեռնությամբ: Այդ օրը աշակերտներն իրենք վարեցին դասը, կատարեցին դասահարցում ու գնահատեցին: Աշակերտներից առավել ակտիվները՝ Միլենա Կիրակոսյանը, Եսենյա Մուսախանյանը, Սոնա Աղազարյանն ու Արամայիս Աբրահամյանը ստանձնել էին ուսուցչի դերը և թեման՝ «Հայոց եկեղեցու կազմակերպումը Կիլիկյան Հայաստանում» դասավանդեցին իրենց մոտեցմամբ ու պատկերացումով: Աշակերտները նախապես պատրաստել էին սալիկահանդես, որի միջոցով վեր հանեցին Կիլիկիայում հայկական պետականության ստեղծման գործում հայոց եկեղեցու ունեցած մեծ դերը, ծանոթացրին Հայաստանից դուրս ստեղծված Հայոց եկեղեցու հակաթոռ կաթողիկոսության ստեղծման պատճառներին, պատկերացում տվեցին Կիլիկյան Հայաստանում Հայոց եկեղեցու կազմակերպման գործընթացի, նրա կառույցների ստեղծման փուլերի մասին: Ես որպես ծնող ներկա էի այն խանդավառությանը, որ երկու օր շարունակ ապրում էին աշակերտները: Ամեն մեկը քաջ գիտակցում էր իր պարտականությունը և մեծ պատասխանատվությամբ էր ստանձնել գործը: Ինձ թվում է՝ այս դասը ութերորդցիները երկար կհիշեն, և աշակերտ-«ուսուցիչների» քայլը վարակիչ կլինի մյուսների համար:
Հերմինե Հայրոյան/Անգլերենի ուսուցչուհի/