ՀԱՅՈՑ ԲԱՆԱԿԻ ՕՐՎԱՆ ՆՎԻՐՎԱԾ ՄԻՋՈՑԱՌՈՒՄՆԵՐԻ ՇԱՐՔ ԵՐԵՎԱՆԻ Տ. ՇԵՎՉԵՆԿՈՅԻ ԱՆՎ. Հ. 42 ԱՎԱԳ ԴՊՐՈՑՈՒՄ
Մոտենում է հունվարի 28-ը՝ Հայոց բանակի օրը...
Երևանի Տ. Շևչենկոյի անվան թիվ 42 ավագ դպրոցում մեկնարկեց այդ օրվան նվիրված ավանդական միջոցառումների շարքը. արիության դասեր, տոնական միջոցառումներ, հանդիպումներ զինվորականների հետ, որոնք միտված են ազգային ինքնության գիտակցմանը, հայրենասիրական ոգու բարձրացմանը, հայրենիք-դպրոց-բանակ հարաբերությունների ամրապնդմանը:
Դպրոցը, սիրով ընդունելով ՀՀ ԿԳ նախարարի հանձնարարականը, անմիջապես ձեռնամուխ եղավ նամակների
ուղարկմանը դպրոցի շրջանավարտ այժմ հայոց բանակում ծառայող զինվորներին, որում մասնավորապես նշվում է. ՙՙՈղջո՛ւյն, իմ ավագ ընկեր, անկախ Հայաստանի զինվոր, տոնդ շնորհավո՛ր: Դու մեր հայրենիքի, հողի, սահմանի պաշտպանն ես, մեր խաղաղ կյանքի ու հանգստի պաշտպանը: Ես հպարտանում եմ քո մարտական ոգով, քո քաջությամբ, քո տոկունությամբ և քո անձնվիրությամբ:
Ես հավատում եմ քեզ, զինվո՛ր: Դու հայոց բանակի հիմքն ու հենասյունն ես, դու հզոր ու անպարտ հայկական բանակի զինվորն ես, քո երակներում ազատատենչ Հայկի ու նրա քաջազուն ժառանգների, մեր երկրապահների արյունն է հոսում, ամո՛ւր պահիր մեր երկրի սահմանները, որ հավերժի մեր հայրենիքը:
Ես հպարտությամբ եմ գալու հերթափոխի՚՚:
