Հայաստանի 3-րդ հանրապետության, հայոց պետականության անվտանգության և անկախության պահպանման հարցը առաջնահերթ նշանակություն ստացավ, որի երաշխիքը կարող էր լինել միայն մարտունակ բանակը:
Կարճ ժամանակում մենք կարողացանք ոչ միայն կազմակերպված բանակ ստեղծել, այլև մեր դարավոր ոսոխին ցույց տալ մեր բազկի ու զենքի ուժը՝ նրան դուրս շպրտելով մեր հինավուրց հայրենիքի չքնաղ բեկորից՝ ազատատենչ Արցախից:
Հայոց բանակն այսօր 23 տարեկան է, ի հեճուկս ճակատագրի ու ոսոխների, զենքի և քաջերի պակաս չի զգում:
Կարբիի Վահան Թեքեյանի անվան միջնակարգ դպրոցը անմասն չմնաց հայոց բանակի տարեդարձը նշելուն, դպրոցի ողջ անձնակազմը և աշակերտությունը դպրոցի բակում անցկացրեցին հանդիսավոր տողան: Օրհներգի հնչյունների ներքո բարձրացվեց հայոց եռագույն դրոշը: Դպրոցի տնորենը ողջունեց և շնորհավորեց բոլորին:
Հանդիսությունը շարունակվեց դպրոցի դահլիճում, որտեղ ուսուցիչներ Վարդանուշ Հովհաննիսյանի և Սյուզաննա Նանյանի ջանքերով կազմակերպվել էր գեղեցիկ և բովանդակալից միջոցառում՝ նվիրված հայոց բանակի 23-րդ տարեդարձին:
Մեր բանակը շարունակելու է հզորանալ և սրբորեն պաշտպանել իր պետության ինքնիշխանությունը: Մենք դեռ վրեժ ունենք պատմությունից լուծելու. կորցնելու իրավունք չունենք այլևս…