Հայ ժողովրդի սիրելի տոներից է Տրնդեզը, որի ակունքները գալիս են հազարամյակների խորքից: Յուրաքանչյուր տոն իր մեջ մեծ խորհուրդ ունի և միաժամանակ միջոց է համախմբելու հանրությանը: Հայ Առաքելական Եկեղեցին ամեն տարի փետրվարի 14-ին Քրիստոսի Սուրբ ծննդյան օրվանից 40 օր հետո, մեծ հանդիսավորությամբ, նշում է 40 օրական մանուկ Հիսուսին տաճարին ընծայելու տոնը՝ Տյառնընդառաջը: Տոնը Տիրոջն ընդառաջ գնալու հրավեր է բոլորին: Քրիստոսը՝ Աստծո Միածին որդին, երկնքից խոնարհվեց և մեր փրկության համար աշխարհ եկավ:
Կարբիի Վ. Թեքեյանի անվան միջնակարգ դպրոցի ուսուցիչները և աշակերտները նույնպես նշեցին ազգային այս գեղեցիկ տոնը դպրոցի բակում: Հավաքվածները տոնը սկսեցին Տերունական աղոթքով: ՀԵՊ ուսուցչուհի Վ. Բաղդասարյանի օգնությամբ 10-րդ դասարանի աշակերտները ներկայացրեցին տոնի հետ կապված պատմական դեպքերն ու իրադարձությունները: Տոնի հիմնական ծեսը խարույկ վառելն է, վառվող կրակի շուրջ բոլորը շուրջպար բռնեցին, հետո երեխաները թռան կրակի վրայով՝ մաքրագործվելու և ծնունդը նվիրագործելու համար: 
Այս ծեսը լույսի մի յուրօրինակ տոնախմբություն է, որը Սիմեոն ծերունու` Քրիստոսին տված Լույս անվանման խորհուրդն ունի: