ՀՀ ՈՍ անչափահասների բաժնի պետ Ն. Դուրյանի գլխավորությամբ ամեն տարի տարածքային ոստիկանության անչափահասների գծով տեսուչները այցելում են դպրոցներ: Այս տարի այդ նախաձեռնությանը միացել է Հայոց եկեղեցին: Նմանատիպ հանդիպումները, ինչ խոսք, զգոնացնում են աշակերտին, իրազեկում և ուղղորդում՝ քայլել ճիշտ ու ճշմարիտ ճանապարհով: Ու հենց այս նախաձեռնության շրջանակներում էլ Սուրենավանի միջնակարգ դպրոցն այսօր իր հարկի տակ հյուրընկալել էր ոստիկանության Արարատի բաժնի անչափահասների գործերով ավագ տեսուչ Արմեն Գրիգորյանին ու Արարատի Սուրբ Հակոբ եկեղեցու հոգևոր հովիվ Տեր Դավիթ քահանա Սահակյանին: Հանդիպմանը ներկա էին 7-11-րդ դասարանի աշակերտներ և ուսուցիչներ: Մինչ բուն թեմային անցնելը ներկաները աղոթք բարձրացրին առ Աստված, հետո Տեր Դավիթ Սահակյանը ներկայացրեց Հայոց եկեղեցու դերն ու նշանակությունը, խոսեց աղանդների ու դրանց վտանգավոր հետևանքների մասին, հորդորեց ամրանալ ճիշտ հավատքով: Զրույց-զեկույցով հանդես եկավ նաև անչափահասների գործերով ավագ տեսուչ Արմեն Գրիգորյանը, ով խոսեց անչափահասների կատարած իրավախախտումների, հանցագործության տեսակների ու պատժամիջոցների մասին: Աշակերտների կողմից հնչած հարցերը ստացան սպառիչ պատասխաններ: