«Դպրոց կենտրոնների միություն» իրավաբանական անձանց միության առաջարկով Արագածոտնի մարզի Կարբիի Վ. Թեքեյանի անվան միջնակարգ դպրոցում տեղի ունեցավ մայրենի լեզվի միջազգային օրվան նվիրված ցերեկույթ, որը կազմակերպել էին 8-բ դասարանի աշակերտենրը, դասղեկ՝ Լ. Մելքոնյան:
Միջոցառման նպատակն էր ներկաների ուշադրությունը սևեռել մեր աստվածատուր լեզվին, որը դարձավ հայ ժողովրդի գոյապահպանման միջոց:
Երեխաները տեղեկություններ տվեցին հազարամյակներից ժառանգած մեր մեծագույն գանձի՝ մեսրոպատառ մայրենիի անցած ուղու մասին մինչև գրերի գյուտը, հայոց գրերի ստեղծման անհրաժեշտությունից մինչև Մ. Մաշտոցի տքնաջան աշխատանքը:
Նրանք արտասանեցին Եղիշե Չարենցի, Խաչիկ Դաշտենցի, Նաիրի Զայրանի, Համո Սահյանի, Սիլվա Կապուտիկյանի և այլոց բանաստեղծությունները, որոնց մեջ մայրենի լեզուն գովերգվել է տարբեր բառերով, բայց միևնույն քնքշությամբ և սիրով:
Աշակերտները ներկայացրեցին նաև ասույթներ մայրենի լեզվի մասին, որոնք արժևորում էին նրա դերն ու նշանակությունը հայ ժողովրդի համար: Ողջ միջոցառման ընթացքում թևածում էր մայրենիի շունչը, որով էլ տոգորված աշակերտները երդվեցին, որ սրբորեն կպահեն և կպահպանեն մեր ինքնության հիմնական գրավականը՝ մեր անաղարտ մայրենին:
Դասղեկ Լ. Մելքոնյանը աշակերտներին պատմեց, թե ինչպես էին հայ մայրերը գաղթի ժամանակ Դեր-Զոր անապատում իրենց երեխաներին սովորեցնում այբուբենի տառերը: Նրանք մատներով ավազի վրա գրում էին՝ Ա, Բ, Գ..., այն դեպքում, երբ իրենք էլ չգիտեին՝ կենդանի կմնան, թե զոհ կգնան թուրքի յաթաղանին:
Գովեստի խոսքեր ասացին դպրոցի փոխտնօրեններ Լ. Հովհաննիսյանը և Ս. Հակոբյանը:
Նրանք աշակերտներին պատգամեցին, որ մայրենի լեզուն սրբություն է յուրաքանչյուր մարդու համար ինչպես մայրը, հայրենիքը: Հայ մնալու համար թեկուզ օտար երկրում, պանդխտության մեջ չպետք է մոռանալ մայրենի լեզուն:
Մայրենիին նվիրված միջոցառումը ծառայեց իր նպատակին: Աշակերտները ևս մեկ անգամ խորհրդակից եղան օրվա խորհրդին: