Էջմիածնի Մ. Գորկու անվան դպրոցում բանաստեղծ Խաչիկ Մանուկյանին հյուրընկալեցին առանձին սիրով: Տեսե՛ք, թե ի՜նչ հայացքներով են պատանիներն ու աղջիկները հետևում նրա խոսքին: Այն, ինչ նրանք լսեցին այսօր իրենց սիրելի բանաստեղծի շուրթերից, իրենք կտանեն իրենց ողջ կյանքի միջով՝ որպես պատգամ, որպես վեհին ու ազնիվին հետևելու պատգամ, որպես հայրենիքին ու սեփական արժեքներին անդավաճան մնալու հորդոր, որպես սիրո աննման ակնթարթները նկատելու տեսանկյուն ու կյանքի գեղեցկությունը գնահատելու չափորոշիչ: Այդ դասերը նրանց ամեն օր տալիս են իրենց կոչմանը նվիրյալ ուսուցիչներն ու դպրոցի տնօրեն Գայանե Միչիկյան-Սաֆարյանը: Ու այս դաս-հանդիպում-ցերեկույթն այն բարձրակետերից մեկն էր, որ ցուցանեց դպրոցի մանկավարժական կազմի՝ տարիներ շարունակ աճող սերնդին տրվող դաստիարակության հասուն բողբոջները, բողբոջներ, որ վաղն առողջ ու հյութեղ պտուղներ են տալու: