Արմաշը Արարատի մարզի այն գյուղերից է, որտեղ դեռ առկա են հայ-ադրբեջանական պատերազմի ժամանակ թշնամու գնդակներից առաջացած վերքերը: Վերքեր, որոնք սպիացել, բայց շարունակում են զգացնել տալ: Անշուշտ, սահմանին ապրող յուրաքանչյուր ոք զինվոր է: Առավել ևս զինվոր է ապագա զինվորին դաստիարակող ուսուցիչը: Մայիսի 8-ը Արմաշի միջնակարգ դպրոցում տոնական էր: Դպրոցի՝ Արկադի Տեր-Թադևոսյանի անունը կրող դասարանի սաները՝ երկրորդցիները/դասվար՝ Ո. Վարդանյան/ նախաձեռնել էին միջոցառում, որը կրում էր «Հաղթանակելը հայի գենի մեջ է» խորագիրը: Այն նվիրված էր Շուշիի ազատագրման 23 ամյակին և ազատագրման գործի առաջամարտիկ, մերօրյա լեգենդ, գեներալ-մայոր Արկադի Տեր-Թադևոսյանին: Փոքրիկների շուրթերից հնչեցին բանաստեղծություններ, հայրենասիրական երգեր, ներկայացվեց լեգենդի կյանքն ու անցած ուղին, ցուցադրվեցին հատվածներ հերոսի կյանքը ներկայացնող փաստավավերագրական ֆիլմերից: Միջոցառումը սկզբից մինչև վերջ շաղախված էր հուզմունքով, հպարտությամբ ու երախտագիտության խոսքերով: Աշակերտները երդվեցին լինել այնպիսի զինվոր, ինչպիսին եղել է Արկադի Տեր-Թադևոսյանը: Միջոցառման վերջում ոգեշունչ խոսքով հանդես եկավ դպրոցի ուսումնական գծով փոխտնօրեն Ք. Սարգսյանը, ով հպարտաձայն ու հուզումնախառն հայացքով կոչ արեց գնահատել ապրողաց և պատգամեց հայոց մայրերին՝ ծնել առյուծ զավակներ, որպեսզի Հայաստանը միշտ լինի քարտեզի վրա:

Ն. Զեյնալյան/«Բողբոջ» ամսաթերթի խմբագիր/