ՀԱՂԹԱՆԱԿԻ ՕՐԸ ԿԱՊԱՆԻ Հ. 2 ԱՎԱԳ ԴՊՐՈՑՈՒՄ
Մենք՝ Սյունիքի մարզի Կապանի N2 ավագ դպրոցի աշակերտական խորհրդի անդամներս ուսուցիչների հետ այցելեցինք Արցախ՝ ներկա գտնվելու երկրամասի եռատոնի արարողությանը: Դեռ ոտք չդրած ազատության շողերով լեցուն Արցախ աշխարհի հողին՝ մեզ դիմավորեցին Շուշի քաղաքի Խ.Աբովյանի անվան դպրոցի ուսուցիչները և աշակերտները: Հենց այդ օրը սկսվեց բարեկամության կամուրջի շինարարությունը, որը ձգվելու է հինավուրց Շուշիից մինչև արևաշող Կապան: Հրապարակում, մարդաշատ փողոցներում, ամենուր զրնգում էր ուրախության երգն ու պարը: Եղանք նաև Ստեփանակերտ քաղաքում: Մանկական զբոսայգում մեր գեղարվեստական համարներով մասնակցեցինք արցախցիների եռատոնի շնորհավորանքներին: Մեր մաղթանքներն ենք հղում արցախցիներին.
Արցախ ժողովուրդ. Ապրես պիտի զերծ հողմերից,
Ապրես պիտի, որ քո Շուշին
Հին ծիծաղը խառնի նորին,
Ապրես պիտի, որ քո հողում
Գարուն լինի վառ ու բեղուն:
Ապրես պիտի ու բարձրանաս
Քիրսիդ պես բարձր մնաս,
Որ ինչքան էլ աղետ լինի
Մութդ լույսով ծիածանվի:
