Նորից մայիս… Հաղթանակների ամիս… Ծիծաղ, խնդություն, դրոշներ՝ կարմիր, եռագույն… քայլերգ ու երթ դեպի հուշահամալիր:
Գայի միջնակարգ դպրոցի բակում հավաքվել են աշակերտները, ծնողները, ուսուցչական կոլեկտիվը և տնօրենությունը:
Բոլորի տրամադրությունը շատ բարձր է ու տոնական: Խումբը ուրախ շարժվում է դեպի գյուղի կենտրոնում գտնվող Հայրենական մեծ պատերազմի հիշատակին կառուցված հուշակոթողը, որը կրում է «Մայր Հայաստան» անունը:
Հուշարձանի մոտ հանգչում են Արցախյան հերոսամարտում նահատակված հերոսները: Մի պահ լռում են բոլորը. Հավերժ փառք բոլոր ընկածներին: Ոչ ոք չի մոռացվում, ոչինչ չի մոռացվում: Ու հետո հնչում են ուրախ երգերը: Հայ մանուկների բերանով վրեժի, ուրախության, հաղթության խոսքեր են հնչում: Նոր ծաղկած վարդաստանում պարում է սիրած տղային բանակ ճանապարհած հայուհին ու սպասում նրան: Ու քանի որ հավատում ենք վաղվա օրվա հաջողությանը, լուսավոր առավոտին, վերջապես գալիս է նրա զինվորը՝ հայրենիքի պաշտպանը:
Ցնծում է գյուղը, բոլորն ուրախանում են: Հպարտ կանգնած են կողք կողքի Արցախյան հաղթանակած հերոսները՝ անցած արյունոտ ճամփան աչքերի առաջ, կորցրած ընկերների անունն ու կարոտը սրտներում:
Թող միշտ ուրախ ապրի հայը, խաղաղ հերկի իր հողը աշխատավոր գյուղացին ու բանակ գնացած բոլոր հայորդիները ողջ-առողջ վերադառնան հայրենի տուն…

«Գայի միջնակարգ դպրոց» ՊՈԱԿ-ի
Հայոց լեզվի և գրականության ուսուցչուհի Ա. Արշակյան