Գավառի N5 հիմնական դպրոցի 9-րդ դասարանում կազմակերպվեց բաց դաս հայոց լեզվից (ուսուցչուհի Ա. Բոստանչյան): Այն գործնական աշխատանքի դաս էր. աշակերտները հարցազրույցի էին հրավիրել բանաստեղծ Հովհաննես Շիրազին: Դասը նվիրված էր Մեծ եղեռնի հարյուրամյա տարելիցին և Շիրազի ծննդյան 100-ամյակին:
Ինքնատիպ էր բանաստեղծի մուտքը դասարան. Նա ներս մտավ խորհրդանիշ գարնան հետ ձեռք ձեռքի տված՝ գարնանային ծաղիկներ բաժանելով ներկաներին: Ապա կատարվեց Շիրազի թագադրումը, և «Թագադրում»-ի անզուգական տողերի ներքո նա օծվեց որպես գարնան թագավոր: Աշակերտները բազմաթիվ հարցեր ուղղեցին «հեղինակի աթոռին» բազմած «թագավոր - բանաստեղծին» և նրանից լսեցին անկեղծ ու անմիջական պատասխաններ իր կյանքի հիշարժան դրվագների և ստեղծագործության վերաբերյալ: Հարցերը զուգակցվում էին Շիրազի բանաստեղծությունների և «Հայոց Դանթեականից»-ից բերված հատվածների արտահայտիչ արտասանության հետ: Երբեմն էլ դրանք ընդմիջվում էին շիրազյան խոսքերի հիման վրա գրված հուզիչ երգերով:
Դասն ընթացավ շնորհանդեսի ցուցադրմամբ, որի հեղինակը նույնպես աշակերտներն էին: Բանաստեղծի ներկայությունը դասը դարձրեց էլ ավելի հետաքրքիր ու բովանդակալից: