Սևանի Խ. Աբովյանի անվան ավագ դպրոցում ապրիլի 22-ից սկսվել էր հայոց լեզվի և գրականության ավանդական շաբաթը: Դպրոցում առարկայական շաբաթները կազմակերպվում են բարձր մակարդակով, հարուստ են լինում բաց դասերով, տարբեր միջոցառումներով, փոխադարձ դասալսումներով:
Հայոց լեզվի և գրականության առարկայական շաբաթը սկսվեց X իրավագիտական հոսքի կազմակերպած յուրօրինակ միջոցառումով՝ «Ձայն բազմազ… ձայն աստծո» խորագրով: Յուրահատուկ ճաշակով ձևավորված դասասենյակը տրամադրող էր, իսկ երբ սկսվեց իր բովանդակությամբ էլ յուրօրինակ միջոցառումը, ունկնդիրները լցվեցին երկյուղածությամբ: Հայ գրականությունից առանձնացվել էին Աստծուն, մարդուն, սիրուն նվիրված ամենադիպուկ ու քնքուշ տողերը: Աշակերտների շուրթերով խոսում էին Նարեկացին, Քուչակը, Սայաթ-Նովան, Պետրոս Դուրյանը և ուրիշ մեծեր:
Տպավորիչ էր «Հին աստվածներ» դրամայից ընտրված հատվածը՝ Վանահոր և Մարիամ իշխանուհու զրույցը: Մի պահ թվում էր, թե ոչ թե աշակերտներն են խաղում, այլ պրոֆեսիոնալ դերասաններ: Իսկ երբ հայտնվեց քնքուշ ու եթերային Անժելան և երազների նման գունագեղ վարդի թերթեր սփռեց շուրջը, ունկնդիրների զմայլանքը հասավ գագաթնակետին: Շնորհակալության ջերմ խոսքեր հնչեցին աշակերտների և հայոց լեզվի և գրականության փորձառու ուսուցչուհու՝ Անահիտ Մկրտչյանի հասցեին, ովքեր ներկաներին նվիրեցին սքանչելի այդ միջոցառումը: