2014 թ. փետրվարի 27-ից մարտի 2-ը ք. Ծաղկաձորի «Գրողների ստեղծագործական տուն» հյուրանոցային համալիրում տեղի ունեցավ «Դպրոց-կենտրոնների միություն» իրավաբանական անձանց միության տարեկան համաժողովը:

   Համաժողովի բացման արարողությանը, որը կայացավ փետրվարի 28-ին, հրավիրված էին բազմաթիվ հյուրեր՝ կրթության ոլորտի պատասխանատուներ, ԱԺ պատգամավորներ, միության անդամ դպրոցների տնօրեններ: ՀՀ կրթության և գիտության փոխնախարար Կարինե Հարությունյանը, ողջունելով համաժողովի մասնակիցներին, իր խոսքում նշեց, որ հանրակրթության ոլորտում իրականացված բարեփոխումների առաջնորդող ուժը եղել է հենց դպրոցը, որտեղ այս տարիների ընթացքում քննարկվել են բազմաթիվ ծրագրեր, փորձագիտական  քննություն են անցել դասագրքեր և այլն:   Փոխնախարարը գոհունակություն հայտնեց, որ  միությունը կայացել է. այն, ըստ Կ. Հարությունյանի, ակտիվ գործունեություն է իրականացնում, փորձարկում բազմաթիվ նորարարություններ` հանրակրթության որակի բարձրացման նպատակով: ՀՀ կրթության և գիտության փոխնախարար Մանուկ Մկրտչյանը խոսեց բարեփոխումների ընթացքի, դրանցում հասարակայնության ներգրավման և բազմաթիվ այլ խնդիրների մասին: «Դպրոց-կենտրոնների միության» նախագահ, Աժ պատգամավոր Ռուզաննա Մուրադյանն ամփոփեց 2012-2013թթ միության  իրականացրած աշխատանքները և ծրագրային ուղղությունները:  Ընթերցվեցին նաև ՀՀ Ազգային ժողովի նախագահի և Երևանի քաղաքապետի ուղերձները:

   Համաժողովի ընթացքում ողջույնի խոսքով հանդես եկան  ՀՀ ԿԳՆ հանրակրթության վարչության պետ Նարինե Հովհաննիսյանը, ՀՀ ԿԳՆ «Կրթական ծրագրերի կենտրոն» ԾԻԳ-ի տնօրեն Հասմիկ Ղազարյանը, ուսուցիչների մասնագիտական զարգացման և վերապատրաստման  ենթածրագրի ղեկավար Կարեն Մելքոնյանը:

   Կրթության պետական տեսչության պետ Արամ Կարապետյանը համաժողովի մասնակիցներին ներկայացրեց դպրոցի կրթական գործունեության նկատմամբ վերահսկողության, կրթական գործունեության ուսումնասիրության արդյունքների վերլուծության իրականացման արդյունավետ մեխանիզմները:

   Ողջույնի խոսքով հանդես եկավ նաև Մայր Աթոռ Սուրբ Էջմիածնի Քրիստոնեական դաստիարակության կենտրոնի տնօրեն Հայր Վարդան Նավասարդյանը:

   Համաժողովի ընթացքում «Դպրոց-կենտրոնների միություն» իրավաբանական անձանց միության տնօրեն Լիլիթ Անտոնյանը ներկայացրեց 2013-2014թթ. ծրագրային նոր ուղղությունները, ինչպես նաև տեղի ունեցավ վեբ կայքի շնորհանդեսը:

   «Դպրոց-կենտրոնների միություն» ԻԱՄ-ի և «Դիլիջան Ինտերնեյշնլ Սքուլ օֆ Արմենիա» հիմնադրամի միջև ստորագրվեց հուշագիր, ըստ որի՝ UWC Դիլիջան դպրոցը և «Դպրոց կենտրոնների միություն» իրավաբանական անձանց միությունը պատրաստակամություն են հայտնում նպաստելու Հայաստանի՝ համաշխարհային կրթական քարտեզի վրա կարևոր դիրք ձեռք բերելու գործընթացին: