Գործունեություն

«Դպրոց-կենտրոնների միություն» ԻԱՄ-ի գործունեությունը.

                       2004-2009թթ.

         2004-2009թթ. Հայաստանի տարածքը բաժանվեց 52 կրթական գոտիների (քլաստեր)  և ըստ «կրթական գոտիների» ընտրվեցին 52 դպրոցներ, որոնք դարձան տվյալ տարածաշրջանի դպրոց-կենտրոններ:

         Դպրոց-կենտրոնների ունեցած նյութական ռեսուրսները և ձեռք բերած փորձը համակարգելու և զարգացնելու նպատակով  դպրոց-կենտրոնների տնօրենների, ՀՀ ԿԳ նախարարության և այլ շահագրգիռ կառույցների միջև քննարկումների արդյունքում առաջարկվեց ստեղծել «Դպրոց-կենտրոնների միություն»:

                       2010-2012թթ.

         2010թ. դեկտեմբերի 23-ի ՀՀ Կառավարության N1707-Ն որոշմամբ  թույլատրվեց հիմնադրել «Դպրոց-կենտրոնների միություն» իրավաբանական անձանց միությունը:

         2012թ, օգոստոսի 1-ին ԿԳՆ «Կրթական ծրագրերի կենտրոն» ծրագրերի իրականացման գրասենյակի և «Դպրոց-կենտրոնների միություն» իրավաբանական անձանց միության միջև կնքվեց պայմանագիր, որի համաձայն պաշտոնապես սկիզբ դրվեց «Դպրոց-կենտրոնների միության» գործունեությանը:

         «Դպրոց-կենտրոնների միություն»  իրավաբանական   անձանց  միության  նպատակն է ուսումնասիրել և ներկայացնել ուսուցիչների մասնագիտական գործունեության լավագույն փորձը, աջակցել դպրոցներում նորարարություններին, տրամադրել փոքր դրամաշնորհային ծրագրեր` ուղղված դպրոցների զարգացմանը:

         «Դպրոց-կենտրոնների միություն» իրավաբանական անձանց միության գործունեության շնորհիվ դպրոց-կենտրոնների միջև ստեղծվեց համագործակցության ցանց, որը հնարավորություն ընձեռեց  Հայաստանի Հանրապետության տարբեր  մարզերում  գտնվող  դպրոցներում առկա առաջավոր փորձի փոխանակման և նորարարությունների ներդրման համար: ԴԿՄ-ի կողմից կազմակերպված ամենամսյա մասնագիտական հավաքների շնորհիվ համապատասխան սեմինարավարներն ու ԴԿՄ-ի աշխատակազմը ուսումնասիրեցին տարբեր դպրոցներում գործող հետաքրքիր և առաջավոր փորձը, ինչպես նաև միջազգային համապատասխան մասնագիտական խմբերի գործունեության վերջին նվաճումները:

                         2012-2013թթ.

         2012-2013թթ. «Դպրոց-կենտրոնների միություն» իրավաբանական անձանց միությունը (ԴԿՄ) իրականացրել է մի շարք ծրագրեր, այդ թվում`

1. Էթիկայի նորմերի փաստաթղթի մշակում և ներդրում. նախապես ընտրված փորձագետների հետ մեկտեղ մշակվեց  «Ուսուցչի էթիկայի նորմեր»  փաստաթուղթը, և այն ներդրվեց ՀՀ տարբեր մարզերի մի շարք դպրոցներում:

2. Դպրոցի զարգացման ծրագրի մշակում և ներդրում. նախապես ընտրված փորձագետների կողմից ստեղծվեց «Դպրոցի զարգացման ծրագիր- ուղեցույց» Կրթության զարգացման պետական ծրագրի հիման վրա, և այն ներդրվեց  ՀՀ տարբեր մարզերի մի շարք դպրոցներում:

3. Փոքր դրամաշնորհների տրամադրում. դպրոցներին տրամադրվեցին փոքր դրամաշնորհներ` աջակցելով դպրոցների զարգացման ծրագրերի իրագործմանը, մանկավարժական նորարարությունների ներդրմանն ու տարածմանը, դպրոցների միջև համագործակցության ցանցի ձևավորմանը: Դրամաշնորհային ծրագրերի իրականացման արդյունքում ստեղծվեցին էլէկտրոնային շտեմարաններ, դասի պլաններ, թեմատիկ պլաններ, պրեզենտացիաներ և այլ օգտակար նյութեր: 

4. Տարբեր մասնագիտական հավաքների կազմակերպում. իրականացվեցին մի շարք մասնագիտական սեմինար-հավաքներ` Երևանի և ՀՀ մարզերի ավագ և հիմնական դպրոցների տնօրենների, տնօրենի` մասնագիտական կրթական աջակցությունների և ուսումնական աշխատանքների գծով տեղակալների, սոցիալական աշխատողների (սոց.-մանկավարժների և հոգեբանների), մեթոդմիավորման նախագահների, դասղեկների համար: 

2013թ. «Դպրոց-կենտրոնների միությունը» համալրվեց 32 նորընտիր  անդամներով, և Միության կազմում ընգրկված և ԴԿՄ անդամ հանդիսացող դպրոց-կենտրոնների ընդհանուր թիվը դարձավ 84:

ԴԿՄ-ի մեկ տարվա գործունեության արդյունքում նորաստեղծ կառույցի կարևորագույն ձեռքբերումներից է նաև  ՀՀ տարբեր մարզերի ավելի քան 400 դպրոցների ներգրավումը ԴԿՄ-ի կողմից կազմակերպված տարբեր միջոցառումներին:

                        2013-2014թթ.

2013-2014թթ. «Դպրոց-կենտրոնների միություն» իրավաբանական անձանց միությունը իրականացրել է հետևյալ գործողությունները.

1. Հանրակրթական ուսումնական ծրագրեր իրականացնող բոլոր տիպի դպրոցների համար ներդպրոցական վերահսկողության պլանավորման և իրականացման համալիր փաթեթի մշակում. փաթեթի ստեղծումը հնարավորություն տվեց դպրոցում ուսումնադաստիարակչական գործընթացն ավելի արդյունավետ կառավարելու, առաջացող խնդիրները ժամանակին կանխելու և անհրաժեշտ փոփոխություններ կատարելու համար: Ծրագիրն ուղղված էր հանրակրթական  ուսումնական ծրագրեր իրականացնող բոլոր տիպի դպրոցներում չափորոշչային պահանջների, ուսումնական պլանի, առարկայական ծրագրերի և դպրոցի ուսումնադաստիարակչական աշխատանքների տարեկան պլանի կատարողականի որակի, կառավարման և ղեկավարման արդյունավետության ու թափանցիկության բարձրացմանը:
2. «Դպրոցում սովորողների գիտելիքների, կարողությունների և հմտությունների գնահատում ըստ չափորոշիչների» ուղեցույցի ներկայացում. կրթության համակարգի ապակենտրոնացման և ժողովրդավարացման պայմաններում առաջ են գալիս երկրի կրթական տարածության ամբողջականության ապահովման և անհրաժեշտ հանրային կրթական մակարդակի ապահովման երաշխիքի խնդիրներ, որոնք լուծվում են սովորողների գիտելիքներին, կարողություններին և հմտություններին ներկայացվող չափորոշիչների միջոցով: «Դպրոցում սովորողների գիտելիքների, կարողությունների և հմտությունների գնահատում ըստ չափորոշիչների» ուղեցույցի ստեղծման նպատակն էր ուսուցիչներին ներկայացնել ուսուցանող և թվանշանային գնահատման մեթոդներ և հնարներ, աշակերտների գիտելիքների, կարողությունների և հմտությունների վիճակի վերլուծության մոդելներ` ըստ ուսուցման ժամանակահատվածների:
3. Դպրոցի զարգացման ձեռնարկի  տպագրություն. 2013- 2014թթ. տնօրենների խնդրանքով տպագրվել է արդեն իսկ ստեղծված  դպրոցի զարգացման ծրագրի օրինակելի ձեռնարկ, որը  տրամադրվեց ՀՀ բոլոր դպրոցներին:
4. Էթիկայի նորմերի ձեռնարկի տպագրություն. 2013- 2014թթ. տպագրվել է ուսուցչի էթիկայի նորմերը կարգավորող ձեռնարկ, որը տրամադրվել ՀՀ բոլոր դպրոցներին:
5. Դպրոցի` առանձին մասնագիտական խմբերի հետ հանդիպումների կազմակերպում և գիտամանկավարժական թեմաներով  դասախոսությունների անցկացում. ԴԿՄ-ն կազմակերպել և իրականացրել է դպրոցի վարչական և մանկավարժական անձնակազմի շարունակական կրթությանը,  մասնագիտական զարգացմանը  և իրազեկվածության մակարդակի բարձրացմանը նպաստող գիտամանկավարժական թեմաներով  դասախոսություններ, մասնագիտական հավաքներ,  քննարկումներ: